CARLOMANNUS

I.

CARLOMANNUS

fil. Caroli Calvi maior natu, qui cum contra Patrem conspirâsset, diaconus factus est. Mox iterum rebellis, in vincula coniectus: unde ope Adriani II. liber denuo turbaturus, excaecatus est, et in Monasterium Corbeiae detrusus. Obiit A. C. 873. Flodorard. Aimoin. etc.

II.

CARLOMANNUS

fil. Caroli Martelli, Dux et Princeps Francorum in Austrasia, cum fratre Pipino Griffonem minimum natu, in vincula compegerunt, Hunaldum dein, Aquitaniae Ducem, in ordinem coegerunt; dein regnô divisô, Carlomannus in Germaniam transiens Theobaldum, Alemannorum et Theodoricum, Bavariae Ducem subegit, quorum hic fidem mox fallens, plurimorum caede perfidiam luit. A. C. 746. Hinc commendatô prius fratri Druide filiô, a zacharia Papa sacris initiatus, monasticam vitam suscepit. Obiit A. C. 755. Aimoin. l. 4. Leo Ostiens. l. 1. Hist. Gall. in Childerico II. et Pipino Curto.

III.

CARLOMANNUS

fil. Ludovici Balbi, ex Ansgarde, nobili puella, cum Ludovic. III. fratre, coronatus, A. C. 879. regnô sic divisô, ut Ludovicus Neustriam, Carlomannus Aquitaniam cum Burgundia teneret. Hi cum Ludovico, Alemanniae Rege foedere initô, Bosonem, qui Burgundiae regnum invaserat, praeliô vicerunt, Viennâ, ubi uxorem reliquerat, obsessâ. Sed cum Ludovicus Normannorum incursiones repressurus, domum iter parans, in reditu obiisset, Frater, obsidioni Comite Richardô praepositô, in Picardiam transiit, ubi Barbaros aliquoties victos, tandem, aliquâ pecuniae summâ exhibitâ, discedere penitus coegit. Paulo post prope Montfortium, in venatione, an ab apro, an ab aliquo suorum, letaliter vulnertus, obiit, A. C. 884. Sponsus filiae Bosonis, Regis Arelatensis ex Hermangarde.

IV.

CARLOMANNUS

fil. Pipini Curti, regnô cum Carolo M. fratre divisô, Suessione coronatus est. Paulo post, cum fratre commissus, inquietorum hominum operâ, obiit A. C. 771. Pater duorum filiorum, ex Bertha, quae martiô mortuô ad Taxilonem Bavariae Ducem se recepit. Hist. Franc. in Pipino Curto et Carolo M. Tilletus, San Marth. Geneal. domus Gallicae.

V.

CARLOMANNUS

maior natu fil. Ludovici Germanici, frater Ludov. II. et Caroli, regnum Bavariae, sub se continens>

Pannoniam, Carinthiam, Bohemiam et Moraviam tenuit, cum titulo quoque Italiae Regis. Quod regnum Imperio adiecturus, exercitu collectô, Panicô terrore perculsus, frustra fuit. Paralysi ictus A. C. 880. Ottingae iacet. Pater duorum nothorum, Arnulphi, cui Carinthia obtigit, et Giselae, quae A. C. 890. Zuendipoldo, Moraviae Regi nupsit. Regino, etc.